Fri, 18 Jun 2021

Cebuano news: 17 ka mga rebeldeng NPA sa Bukidnon mi-surender

Philippine Information Agency
14 May 2021, 22:38 GMT+10

MANOLO FORTICH, Bukidnon, Mayo 14 (PIA)--Mi-surender ang 17 ka mga rebeldeng New People's Army (NPA) ngadto sa 1st Special Forces Battalion (1SFBn) ning milabay'ng semana, dala ang mga nagkalain-laing armas ug mga bala.

Matud ni Lt. Col. Vercisio San Jose Jr, commander sa 1SFBn, nga kining 17 ka mga batan-ong lider ug mga combatants sa NPA, naglihok ubos sa Guerilla Front 68A ug 68B, Sub-Regional Sentro De Grabidad ubos sa mando sa Sub-Regional Committee (SRC) 4, North Central Mindanao Regional Committee (NCMRC).

"Misurender kini sila tungod kay matud pa sa lider niini nga grupo, nakita nila kung gi-unsa sila pagpahimulos sa mga kadagku-an sa komunistang CPP-NPA. Ang kooperasyon sa ilang mga paryente ug mga opisyales sa lokal nga kagamhanan nakatabang usab sa pag-surender niini nga grupo sa mga rebelde," matud ni Lt. Col. San Jose.

Si Gov. Jose Ma. Zubiri sa iyang mensahe atol sa seremonya miingon nga dako iyang kalipay dihang iyang nakita ang daghang batan-ong miyembro sa rebeldeng NPA ang naka-desisyon nga mobalik na sa sabakan sa gobyerno.

Diha-diha gitunol sa Gobernador ang tseke nga balor P25,000 ngadto sa matag usa kanila ug misaad kini nga dugangan pa niya ug laing 25,000 pesos aron mahimong 50,000 ang madawat sa mga mi-surender.

"Malipayon ko nga makita nga daghan mga kabataan nga miyembro sa NPA ang nibalik sa sabakan sa gobyerno. Dako akong kalipay tungod kay naka desisyon mo nga monaug na. Dako pa ang higayon nga molambo ang inyong kinabuhi," dugang sa gobernador.

Sa samang okasyon, ang DSWD sa pagpanguna ni Regional Director Mari-Flor Dollaga mihatag ug cash assistance nga nagkantidad ug P10,000; family food packs; hygiene kits; kitchen kits; ug sleeping kits ngadto sa mga mi-surender.

Matud pa ni MGen. Andres Centino, commander sa 4th Infantry 'Diamond' Division, nga ang pagsurender sa 17 ka mga rebelde sa NPA usa sa mga resulta sa gipatumang whole-of-nation approach sa gobyerno.

"Ang 'Peacekeeping' usa ka kaakibat nga responsibilidad. Ang mga paningkamot sa Task Force to End Local Communist Armed Conflict (TF-ELCAC) dili lamang ang koordinasyon ug pagpatuman sa mga programa alang sa mga ka-barangayan. Lakip na niini ang pagpadali sa panaghi-usa sa mga kanhi rebelde ubos sa tabang sa kagamhanan; pag-protekta sa mga sibilyang katawhan; ug uban pang mga mekanismo aron hugot nga mapatuman ang Executive Order No. 70," miingon si MGen Centino. (BGE/PIA-Bukidnon)

More United States News

Access More

Sign up for United States News

a daily newsletter full of things to discuss over drinks.and the great thing is that it's on the house!