Thu, 22 Oct 2020

Usa ka bakery natukod sa ELCAC priority barangay sa Southern Leyte

Philippine Information Agency
22 Sep 2020, 22:38 GMT+10

MAASIN CITY, September 22 (PIA) -- Human sa pagpailalom og pagbansay-bansay sa buhatan sa Technical Education and Skills Development Authority (TESDA) - Southern Leyte Provincial Office, usa ka bakery ang natukod sa prayoridad nga mga barangay sa Pamigsi-an og Olisihan, pulos sa lungsod sa Bontoc, Southern Leyte.

Sumala kang TESDA Provincial Director Elizabeth Garcia atol sa Media Briefing kaniadtong Miyerkules, Septembre 16, 2020, ang mga lumulopyo sa maong mga barangay una nga nagtumbok sa Bread and Pastry og mga construction related nga mga skills trainings ang gipangayo nila.

Ang maong duha ka barangay maoy prayoridad nga mga barangay ubos sa pagpatuman sa Executive Order 70 kon Whole of Nation Approach sa pakig-bugno batok sa insurhensiya kon End Local Communist Armed Conflict (ELCAC), ang programa nga gi-umol ni Presidente Rodrigo Roa Duterte, dugang pahayag ni Garcia.

Dugang pasabot niya nga ang maong pagkatukod og usa ka bakery gi-abagan usab sa buhatan sa Department of Labor and Employment (DOLE), kinsa mao ang magtunol sa mga kahimanan sa usa ka bakery sama sa oven para mapadayon ang maong prohekto.

Matud ni Garcia, ang ilang buhatan mao ang naghatag og pagbansay-bansay samtang ang buhatan sa DOLE mao ang motabang sa pag-apod-apod og mga kahimanan aron maahimong makasugod na og panginabuhi-an ang mga katawhan.

Ang maong bakery mao pa ang labing una nga bakery nga natukod sa halayong mga barangay sa Bontoc.

Ang maong mga dapit bisan og walay presensya sa mga NPAs apan natumbok nga na-ilalom sa Geographically Isolated and Disadvantaged Areas (GIDA) nga programa sa gobierno diin halos dili na nila naatagamtaman ang mga kalihokan sa gobierno tungod sa ilang halayo nga kahimtang.

Og pinaagi sa Task Force -End Local Communist Armed Conflict (TF- ELCAC) nga gitahasan ni PRRD sa pagdala sa mga programa og prohekto sa gobierno ngadto sa maong matang sa mga barangay. (esg/PIA-Southern Leyte)

More United States News

Access More

Sign up for United States News

a daily newsletter full of things to discuss over drinks.and the great thing is that it's on the house!