Thu, 20 Feb 2020

Cebuano News: Proyektong lambigit sa AGUSAN UP prayoridad sa AgNor

Philippine Information Agency
17 Jan 2020, 18:38 GMT+10

DAKBAYAN SA BUTUAN, Enero 17 -- Kinahanglang malambigit sa tanang opisina sa kapitolyo ang ilang mga proyekto niining tuiga ug sa mosunod nga duha ka tuig sa mga gipunting sa AGUSAN UP!

Kini ang direktiba ni Agusan del Norte Gob. Dale B. Corvera sa mga hepe sa opisina nga mi-presenta sa ilang plano sa 2020 atol sa unang adlaw sa Provincial Management Committee meeting nga gihimo niadtong Enero 14.

Buot lang segurohon sa gobernador nga ang mga kalihukan sa probinsya nagsuporta gyod sa kampanya niya sa paglambu nga mao ang AGUSAN UP!

Buot usab sa gobernador nga ang tanang naka budget kinahanglang magasto gyod. Sayang ang mamugna untang serbisyo, trabaho, negosyo o dugang kita kung di magamit ang nakagahin na unta nga pundo.

Dugang ni Gob. Corvera nga giila niya ang mga hepe sa opisina nga lider sa ilang tagsa-tagsa ka buhatan ug gilantaw niya nga sila ang magdala sa mga empleyado sa usa ka direksyon.

Gidasunan pa gyod sa gobernador nga gitan-aw niya ang mga hepe sa opisina nga kabahin sa usa ka hugot nga nagkahiusang pamilya kung ang magkalambigit nga lihuk ngadto sa usa ka direksyon ang hisgutan.

Padayonon ang presentasyion sa mga hepe sa opisina sa tagsa-tagsa nila ka proyekto sa 2020 karong Enero 21.

Ang AGUSAN UP! mao ang walo ka punto nga development agenda sa Agusan del Norte nga gilangkuban sa upat ka flagship programs: 1. Agus 3Ps o Plant and Process for Prosperity (alang sa ekonomikanhong kalambuan), 2. Amumang Agusanon (alang sa sosyal nga kalambuan), 3. Lunhaw'ng Agusan (alang sa pagpasiuli sa kabaskug sa kinaiyahan), ug 4. Hiniusang Lihuk Agusan (alang sa mga serbisyo pagpalambu sa sistema ug proseso sa pagdumala).

Pinaagi niini nga mga programa gipunting nga makab-ot sa probinsya ang panglantaw niini nga mahimong agri-forest processing center ug economic zone sa Caraga pag-abot sa tuig 2027, makunhoran ang gidaghanon sa mga pobreng pamilya, mapaangat ang kalidad ug maabot sa katilingbanong serbisyo, mapahimsog ang kinaiyahan ug matagamtam sa mga Agusanon ang haruhay nga kahimtang sa pagpuyo. (Jenny D. Fabian/Ronron Amante, Agusan Up, LGU Agusan del Norte/PIA Agusan del Norte)

More United States News

Access More

Sign up for United States News

a daily newsletter full of things to discuss over drinks.and the great thing is that it's on the house!