Sat, 24 Aug 2019

Cebuano News: BFAR PFO mipatinuod sa SAAD sa mga mananagat

Philippine Information Agency
14 Aug 2019, 18:38 GMT+10

PAGPAMENOS SA PAGSALIG SA PAMASIN. Ang mga mananagat sa Bohol dili na kinahanglan pang makigduwa sa kapalaran sa paglawod nga walay katinu-an sa kuha, human gitanyagan sa SAAD ug may giambitan na nga mga fish cages nga seguradong mak makuha sa matag higayon nga manginahanglan. (BFAR)

TAGBILARAN CITY, Bohol, Aug. 13 (PIA)-Gitagana sa Bureau of Fisheries and Aquatic Resources (BFAR) ang kapin sa P3 milyones alang sa tulo ka natumbok nga kalungsuran sa Bohol.

Matud sa Bohol Provincial Fisheries Office (PFO) pinaagi ni Candido Samijon, ang gipahat, alang sa pagpamalit sa gamit sa panagat, ug mga kagamitan sa tulo ka lungsod nga nasakop sa programa nga Special Area for Agricultural Development (SAAD) sa 2019.

Alang sa Ubay, P1,189,005 ang kinatibuk-an nga tanyag alang sa 15 ka units nga payao; 25 ka units nga talabahan ug usa ka unit sa floating cage alang sa tilapia.

Dul-an usab sa usa ka milyon ang hatag alang sa mga kahugpungan sa mga mangingisda sa Candijay, kay ang ilang madawat nga P930,620 maoy bili sa 38 ka units nga talabahan.

Dugang ni Samijon, alang sa Mabini, may gipahat ang kagamhanan nga P1,252,870, ang bili sa 27 ka units sa talabahan; 30 ka units sa nanalingsing na nga guso ug mga kagamitan sa guso-an, samtang may lain pa nga usa ka unit sa freshwater tilapia floating cage alang sa mga mananagat didto.

Ang pagtugyan sa kinatibuk-an nga P3,372,498 nga bili sa mga proyekto sa SAAD sa tulo ka nahisgutan nga kalungsuran, himoon na karong semanaha.

Matud sa PFO Bohol, itugyan ang SAAD alang sa Ubay sa Agosto 13; sa Candijay sa Agosto 15; ug sa Mabini sa Agosto 22.

Kini samtang ang BFAR sa Central Visayas, pinaagi sa PFO nakatugyan na sa kapin sa P2.8 milyones nga bili sa mga proyekto ngadto sa gagmay nga mangingisda ug sa ilang mga kahugpungan sa lalawigan.

Una nga nga gitugyan ang mga proyekto ubay sa pangisda ug panagat ngadto sa natumbok nga mga benepisaryo sa Calape, Buenavista ug Talibon.

Niini, nagpadayag si Samijon nga ang mga proyekto napagawas sa pakig-alayon sa BFAR7-Regional Fisheries Training and Fisherfolk Coordination Division (RFTFCD).

Kahinumduman nga niadtong mi-aging semana, gitugyan sa BFAR ngadto sa mga mananagat sa Barangay San Isidro, Calape ang talabahan ug marine fish cage ug teknolohiya niini nga mokabat sa P717,657.

Mihatag usab ang BFAR pinaagi sa PFO sa P102,050 nga bili sa talabahan ngadto sa 45 ka benepisaryong gagmay nga mananagat sa Buenavista.

Didto usab sa Talibon, P1,071,716 nga bili sa mga proyekto sa SAAD ang gitugyan sa kagamhanan sama sa talabahan nga mikabat sa P612,250; nanalingsing na nga guso ug mga kagamitan sa pangguso nga moabut sa P232,200; ug freshwater tilapia floating cages nga mikabat sa P227,266.

Matud ni Samijon, ang mga nahisgutan nga SAAD projects sa tulo ka lungsod nga natugyanan niini sa mi-aging semana, mikabat sa P2,891,423.

Gihatagan usab ang mga benepisaryo sa tukmang bansay ug personal nga pagdulama sa mga proyektong nadawat aron maseguro nga ilang magamit ug madumala og sakto ang mga eco-friendly ug modernong kagamitan ug teknolohiya human sa pagtahan niini. (rahc/PIA-7/Bohol)

More United States News

Access More

Sign up for United States News

a daily newsletter full of things to discuss over drinks.and the great thing is that it's on the house!